احمي نفسك من سرطان الثدي: خطوات بسيطة ممكن تنقذ حياتك
احمي نفسك من سرطان الثدي: خطوات بسيطة ممكن تنقذ حياتك
هل تعلمين أن واحدة من كل 8 سيدات معرضة للإصابة بسرطان الثدي خلال حياتها؟
مش بالضرورة تكوني أنتِ، أو حد تعرفيه… لكن الحذر واجب، والوقاية ممكنة.
والمفاجأة؟ إن كتير من الحالات بتصيب شابات تحت سن الأربعين!
يعني مش بس خالتك ولا جدتك، ممكن تكون أي واحدة فينا.
أولًا: عوامل الخطر اللي تقدري تتحكمي فيها
1. السمنة وزيادة الوزن
خصوصًا بعد سن 35، كل كيلو دهون بيزود هرمون الإستروجين…
وكل ما زاد الإستروجين، زاد خطر الإصابة بسرطان الثدي.
2. قلة النشاط البدني
الرياضة مش بس بتخسس، دي كمان بتحفّز “الخلايا القاتلة الطبيعية” اللي بتدافع عن جسمك من السرطان.
150 دقيقة مشي في الأسبوع ممكن يقللوا الخطر بنسبة 10–20%.
3. التدخين والمشروبات الكحولية
السجائر والشيشة والمشروبات الكحولية بتزود نسبة الخطر…
بدلهم بكوب ينسون أو عصير رمان 🍷❤️.
4. السكر والدهون المصنعة
السكريات الكتيرة بتحفز الإنسولين وIGF-1، وده بيغذي الخلايا السرطانية.
وخلي بالك من اللحوم المصنعة والدهون المشبعة (اللانشون، البسطرمة، إلخ).
5. السهر وشفتات الليل
السهر ليلاً يقلل هرمون الميلاتونين “الحارس الليلي” اللي بيحمي من الأورام.
نامي بدري، وجربي تقفلي الموبايل قبل النوم بساعة.
ثانيًا: عوامل الخطر اللي ما تقدريش تتحكمي فيها
- تاريخ العائلة والطفرات الجينية: ممكن توصل نسبة الخطر لـ70%.
- سن البلوغ وانقطاع الدورة: لو بدأت بدري أو توقفت بدري.
- تأخر الحمل أو عدم الرضاعة الطبيعية: الرضاعة الطبيعية تحمي، وكل ما زادت مدتها زادت الحماية.
طيب… أعمل إيه عشان أحمي نفسي؟
✔️ خسي
كل 5 كيلو هتخسّيهم، هينزل معاهم الإستروجين الزائد ودهون الجسم.
✔️ اتحركي
مارسي رياضة هوائية (جري، سباحة، مشي سريع) 75 دقيقة أسبوعيًا.
وجربي الجيم مرتين في الأسبوع.
✔️ نوم كافي في الضلمة
نامي 7 ساعات متواصلين في الليل، وسيبي الميلاتونين يشتغل ويقوي المناعة.
✔️ راجعي الأدوية الهرمونية
لو بتاخدي أدوية هرمونية بعد سن الـ40، لازم تراجعي الجرعة والمدة مع الطبيب.
✔️ اهتمي بالتغذية
خدي فيتامين D، كالسيوم، وفيتامين C من الطعام أو المكملات.
المتابعة الدورية مهمة جدًا!
🔍 الفحص الذاتي الشهري
- الفحص البصري قدام المراية، راقبي شكل الثدي في أوضاع مختلفة.
- الفحص اليدوي باستخدام 3 أصابع بحركة دائرية، ولاحظي أي كتل أو تغيرات.
اعمليه بعد انتهاء الدورة كل شهر.
👩⚕️ كشف دوري عند طبيب جراحة الثدي
مرة كل سنة، أو كل 6 شهور لو في تاريخ عائلي.
الخلاصة:
لو فهمتي العوامل اللي مش في إيدك، وسيطرتي بشطارة على العوامل اللي في إيدك…
هتحمي نفسك بإذن الله من سرطان الثدي.
شاركي المقال مع صاحباتك وأهلك… ويمكن تكوني سبب في إنقاذ حياة 💖
