لماذا يتغير شكل جسم المرأة بعد الأربعين؟ أسرار التغيرات الهرمونية وكيف تسيطرين عليها
لماذا يتغير شكل جسم المرأة بعد الأربعين؟ أسرار التغيرات الهرمونية وكيف تسيطرين عليها كانت “نورا” دائمًا رشيقة، تلبس ما تشاء، لا تشغلها الميزان كثيرًا. لكن مع اقترابها من الأربعين، بدأت تلاحظ أن البنطلونات لا تغلق بسهولة، وأن الوزن يزيد رغم أن الأكل كما هو، بل أقل. “أنا ما بأكلش زي زمان، ليه بطني بتكبر؟!”
اللي حصل لنورا بيحصل لكل واحدة فينا، ويمكن تكوني بتعيشي نفس القصة… بس خليني أحكيها لك من الأول.
🍐 من الكمثرى للتفاحة… إزاي بيتغير شكل جسمك؟
طول عمرك كنتي من النوع اللي الدهون عنده بتتجمع في الأرداف والفخدين، شكل “الكمثرى” الكلاسيكي. لكن فجأة… لقيتي الدهون بتتجمع في البطن والذراعين، وتحولتي لـ “تفاحة” من غير ما تعملي حاجة!
ده مش تقصير منك، ولا كسل. دي عملية طبيعية ناتجة عن خمس تغييرات بتحصل لجسمك:
1. اضطراب الهرمونات الأنثوية
مع اقتراب سن الأربعين، مستوى هرمون الإستروجين بيقل. والهرمون ده مش بس مسؤول عن الأنوثة، ده كمان:
- بيزود معدل الحرق.
- بيوجه الجسم يخزن الدهون في أماكن معينة (الأرداف مثلاً).
فلما مستواه يقل، الحرق يقل، وتوزيع الدهون يتغير… والكرش يبدأ يظهر.
2. فقدان الكتلة العضلية تدريجيًا
بعد سن الثلاثين، الجسم بيبدأ يفقد العضلات بنسبة بسيطة سنويًا. والعضلات هي الماكينة اللي بتحرق الدهون.
- عضلات أقل = حرق أبطأ.
- الحرق الأبطأ = دهون أكتر حتى لو بتاكلي نفس كمية الأكل!
3. مقاومة الإنسولين
- الإنسولين هو الهرمون اللي بيساعد الخلايا تاخد السكر وتحوله لطاقة.
- لكن مع الوقت، خلايا الجسم بتبدأ ترفض الإنسولين.
- النتيجة: الجسم يخزن دهون، ويزود الإحساس بالجوع، خصوصًا للحلويات والنشويات.
4. الكورتيزول (هرمون التوتر)
المسؤوليات بتزيد: شغل، أولاد، بيت، وربما زوج بيمر بأزمة منتصف العمر… التوتر يزيد، وجسمك يفرز كورتيزول باستمرار.
الكورتيزول:
- بيزود الرغبة في الأكل (خصوصًا السكر والدليفري).
- بيخزن دهون في البطن.
- بيخلينا ندور على الراحة في الأكل بدل الرياضة!
5. قلة النوم
قلة النوم بتلخبط هرمونات الجوع والشبع:
- بتزود هرمون الجوع.
- وبتقلل هرمون الشبع.
- فتقومي الصبح جعانة… ومش بتشبعي مهما كلتي.
🌱 طيب نعمل إيه؟ خطة متكاملة لمواجهة تغيرات الجسم بعد الأربعين
1. غيّري طريقة تفكيرك
- الوزن مش مقياس لقيمتك.
- التغير الهرموني طبيعي، زيه زي البلوغ.
- اتعاملي مع جسمك بحنان وفهم، مش جلد ذات.
2. غيري طريقة أكلك
- كلي بروتين (بيض، زبادي، فول، عدس، سمك، جبنة قريش).
- زودي ألياف (سلطة، خضار، فاكهة).
- قللي السكر والدقيق الأبيض.
- اشربي ميه كفاية.
- كلي ببطء ووعي، بعيد عن الشاشات.
3. الحركه = حياة
- تمرني مرتين تلاتة في الأسبوع.
- تمارين مقاومة (بلانك، سكوات، ضغط، حتى من البيت).
- عضلاتك هي مفتاح حرق الدهون.
4. اهتمي بالنوم
- 7–8 ساعات نوم يوميًا.
- اطفي النور والموبايل.
- بلاش منبهات بالليل.
5. خدي بالك من التوتر
- وقت خاص بيكي كل يوم.
- أي حاجة بتبسطك وتهدي أعصابك.
- حتى نص ساعة كفاية تهدي الهرمونات.
6. فكري في المكملات
- فيتامين دال.
- أوميجا 3.
- ماجنيزيوم.
- بدائل طبيعية لهرمون الأنوثة (استشيري طبيبك).
الخلاصة:
الجسم بيتغير، مش لأنك بتاكلي كتير، لكن لأن هرموناتك بتتغير. مشكلتك مش كسل… مشكلتك بيولوجيا.
بس التغيير مش نهاية، ده بداية جديدة. البداية اللي هتفهمي فيها جسمك، وتتصالحي معاه، وتدعميه عشان يفضل قوي ورشيق.
ابعتي المقال لصاحبتك اللي دايمًا بتشتكي من الكرش الجديد، وهتقولي لي بعدين: “أنا فهمت جسمي أخيرًا.”
