🍽️ ليه كل يوم بالليل بنرد على نِداء الثلاجة؟!

🍽️ ليه كل يوم بالليل بنرد على نِداء الثلاجة؟! في حاجة غريبة بتحصل بعد نص الليل…
باب المطبخ يفتح فجأة، الأكل يلمع في عينيكي، والثلاجة تنده عليكي تقول:
“تعالي كُليني!”
تحسي إنها “النداهة”… بس النسخة بتاعت الأكل!

ليه كل يوم بالليل بنرد على نِداء الثلاجة؟! خلينا نعرف ليه بيحصل كده؟ وإزاي ممكن نوقف السايكل دي قبل ما تبوظ نظامنا وصحتنا ومودنا.

🤔 ليه بتجوعي فجأة آخر الليل وليه كل يوم بالليل بنرد على نِداء الثلاجة؟! ؟

1. الهرمونات ليها كلمة

• هرمون الجوع (الجريلين) بيعلى لما جسمك يكون مرهق وتعبان.
• هرمون السعادة (السيروتونين) بيقل آخر اليوم، فبتدوري على بديل سريع: شوكولاتة، كريب، سناك من أي نوع.
• جسمك بيحاول يفرحك بالأكل بدل ما تزعلي.

2. الحالة النفسية

• يومك كان مرهق؟
• حد دايقك؟
• متوترة أو زهقانة؟
  غالبًا بتاكلي مش علشان جعانة، لكن علشان تريحي أعصابك أو تعاقبي نفسك.

3. العادات السيئة

• مسلسل 11 بالليل لازم معاه حاجة حلوة.
• الموبايل بإيد، والإيد التانية بتدور على طبق تسالي.
• الأكل بقى مرتبط بوقت الفراغ أكتر من الجوع الحقيقي.

---

🧨 إيه اللي ممكن يحصل لو استسلمتي للنداهة؟

1. تخزين دهون

• جسمك بيستهلك طاقة أقل بالليل، فكل أكلة = دهون بتتخزن.
• “كأنك بتحشري لبس في دولاب مقفول مش مقاسك.”

2. مشاكل في المعدة

• ارتجاع – حموضة – انتفاخ – حرقان صدر.
• والنوم بعدها؟ صعب جدًا.

3. اضطراب في النوم

• مش طبيعي تاكلي كبدة وبعدين تدخلي تنامي.
• جوع آخر الليل بيخرب نظام النوم تمامًا.

---

🛑 إزاي تقولي لأ للنداهة؟

1. واجهي السبب الحقيقي

اعملي روتين استرخاء:

• شاور دافي
• مشروب عشبي من غير سكر
• قرآن
• اكتبي يومياتك (من غير ما تدعي على حد 😅)

2. بلاش حرمان طول اليوم

• لما تعملي دايت قاسي، جسمك بيتمرّد آخر الليل.
• حاولي توزعي أكلك على مدار اليوم.

3. حضّري سناك صحي مسبقًا

• زبادي لايت
• فاكهة متقطعة
• مكسرات
• فشار من غير زيت
• إلغِ الشوكولاتة لأنها بتفتح النفس أكتر.

4. قفلي باب المطبخ

• حرفيًا!
• بعد العشاء، قفلي النور على المطبخ واشربي مية لو جالك جوع كاذب.

---

⚠️ أنواع الأكل الليلي

1. سناك خفيف قبل النوم : هيبقي مقبول لو على فترات بعيدة.
2. نقنقة مستمرة: عادة مرتبطة بالملل والسوشيال ميديا.
3. متلازمة الأكل الليلي: كميات كبيرة بسرعة + إحساس بفقدان السيطرة.
4. الأكل الهرموني: أيام الدورة الشهرية – الجسم بيطلب سكر رسمي بختم وزارة الهرمونات.

---

✍️ تمرين بسيط لمراقبة نفسك

اكتبي يوميًا لمدة أسبوع:

• أكلتي إيه؟
• الساعة كام؟
• كنتي حاسة بإيه وقتها؟
  هتبدأي تلاحظي النمط وسبب الأكل (توتر، ملل، هرمونات… إلخ).

---

💬 الخلاصة

الأكل الليلي زي العلاقات السامة:
في البداية حلو ومريح، و لكن بعد شوية تندمي وتتعبي وتدوري على مخرج.

نصيحة نبع الحنان :

“لما النداهة تنده عليكي، مترديش ! “