طريقة عمل دجاج كنتاكي مقرمش في البيت

طريقة عمل دجاج كنتاكي مقرمش في البيت المقادير لطريقة عمل دجاج كنتاكي مقرمش في البيت  :

للفراخ:
• فرخة متقطعة 8 قطع
• 1 معلقة صغيرة ملح
• 1 معلقة صغيرة فلفل أسود
• 1 معلقة صغيرة بابريكا
• 3 معلقة كبيرة كاتشب أو تشيلي صوص أو هريسة فلفل أحمر
• 2 كوب مياه باردة
(سيبي الفراخ في التتبيلة دي ليلة كاملة في التلاجة)

لتغليف الفراخ :
• 3 كوب دقيق
• 2 معلقة كبيرة مليانة نشا
• 2 معلقة صغيرة بصل بودرة
• 2 معلقة صغيرة ثوم بودرة
• رشة شطة (اختياري)
• طبق فيه مياه مثلجة

طريقة عمل دجاج كنتاكي مقرمش في البيت :
اول خطوه خرّجي الفراخ من التتبيلة و غلّفي كل قطعة كويس بخليط الدقيق، وبعدين قلّبيها في الدقيق 5 مرات أو أكتر علشان الطبقة تبقى سميكة وكرسبي وبعد كده انفضي منها الدقيق الزيادة بهزه خفيفه نزليها في المياه المثلجة ثواني، ورجعيها تاني على الدقيق وقلبيها تاني حوالي 10 مرات لحد ما تتغطى تمامًا و انفضيها تاني من الدقيق الزيادة وسيبيها ترتاح 10 دقايق على شبكة أو مصفاة قبل التحمير.

التسوية الصح دجاج كنتاكي بيتي مقرمش زي الجاهز  :
• سخّني زيت غزير على نار متوسطة (مش عالية أوي عشان ما تتحمرش من بره وتفضل ناية).
• اقلي الفراخ من 12 لـ 15 دقيقة حسب حجم القطع، لحد ما تبقى دهبي ومقرمشة ومستوية تمامًا من جوه وبعدين طلعيها على مصفاة او شبكة سلك تتصفي كويس.

 نصايح مهمة:
• التقليب الكتير في الدقيق هو السر في طبقة كرسبي مظبوطة.
• الراحة قبل القلي 10 دقايق بتساعد التغليفة تثبت وما تقعش في الزيت.
• بلاش تصفيها على مناديل مطبخ، علشان ما ترطبش الطبقة الكرسبي وتخليها طرية. الأفضل تصفيها على شبكة أو مصفاة سلك.
• النار تكون عالية أول دقيقة وبعدين وسط، علشان تستوي مظبوط من جوه وما تتحرقش.

بالهنا والشفا